Пад такой назвай (радкі з верша Навума Гальпяровіча) прайшла творчая сустрэча на базе Навасёлкаўскай сярэдняй школы і Дунілавіцкай сельскай бібліятэкі Пастаўскага раёна Віцебскай вобласці, арганізаваная Інстытутам мовазнаўства імя Якуба Коласа. Мэта сустрэчы – выхаванне патрыятызму і папулярызацыя духоўных каштоўнасцей у моладзі. У мерапрыемстве прымалі ўдзел дырэктар Інстытута мовазнаўства імя Якуба Коласа Ігар Капылоў, паэт, пісьменнік, публіцыст, вядучы праграм “Суразмоўцы”, “Дыялогі пра культуру”, заслужаны дзеяч культуры Рэспублікі Беларусь Навум Гальпяровіч, генеральны дырэктар, заснавальнік і выдавец газет “Шапакляк”, “Друг пенсионера» Анатоль Гармаза, член Саюза пісьменнікаў Беларусі Юлія Зарэцкая.
І. Л. Капылоў расказаў пра Інстытут мовазнаўства, асноўныя напрамкі і вынікі яго дзейнасці, працы, правёў прэзентацыю кнігі “Беларуская мова ад А да Я”. Н. Я. Гальпяровіч прачытаў свае вершы, даў парады, як перамагчы на алімпіядзе па беларускай літаратуры, адзначыў важнасць патрыятызму і духоўнасці як асновы нашай дзяржаўнасці. А .І. Гармаза расказаў пра выданні, адрасаваныя дзецям і дарослым, адкрыў таямніцы творчасці мастака. Ю.Ф. Зарэцкая згадала цікавыя выпадкі працы ў часопісе “Вожык”. Падчас сустрэчы была наладжана зваротная сувязь з моладдзю. Дзеці шчыра дзяліліся сваімі ўражаннямі. Некаторыя школьнікі нават перадалі свае вершы на высокі суд майстроў слова.
Удзельнікі мерапрыемства падарылі кнігі і часопісы вучням і настаўнікам Навасёлкаўскай і Дунілавіцкай сярэдніх школ, а таксама чытачам Дунілавіцкай сельскай бібліятэкі.
