inf.list_ethnolinguistic.docx

У філіяле “Інстытут мовазнаўства імя Якуба Коласа” Цэнтра даследаванняў беларускай культуры, мовы і літаратуры НАН Беларусі 18–19 лістапада будзе праходзіць Міжнародная навуковая канферэнцыя “Этналінгвістыка і традыцыйная культура: дыяхранічны і сінхранічны аспекты міжмоўнага ўзаемадзеяння”. Па выніках канферэнцыі запланавана выданне зборніка навуковых артыкулаў і яго размяшчэнне ў базе РІНЦ (Расійскі індэкс навуковага цытавання).

Уся актуальная інфармацыя размешчана ў інфармацыйным лісце.

Запрашаем да ўдзелу!

З 5 па 9 ліпеня ў Глыбоцкім раёне Віцебскай вобласці праходзіла дыялекталагічная экспедыцыя супрацоўнікаў аддзела дыялекталогіі і лінгвагеаграфіі сумесна з супрацоўнікамі аддзела лексікалогіі і лексікаграфіі Інстытута мовазнаўства імя Якуба Коласа. У экспедыцыі ўдзельнічалі В. М. Курцова, загадчык аддзела дыялекталогіі і лінгвагеаграфіі, І. В. Галавіна, малодшы навуковы супрацоўнік гэтага аддзела і А. А. Марозава, навуковы супрацоўнік аддзела лексікалогіі і лексікаграфіі.

З 5 па 9 ліпеня 2021 года старшыя навуковыя супрацоўнікі аддзела дыялекталогіі і лінгвагеаграфіі Інстытута мовазнаўства імя Якуба Коласа кандыдаты філалагічных навук Юрый Маліцкі і Вадзім Шклярык знаходзіліся ў планавай дыялекталагічнай экспедыцыі, якая праходзіла ў Веткаўскім раёне Гомельскай вобласці. Трэба адзначыць, што ў 2020 годзе з прычыны аб’яўленай пандэміі экспедыцыйныя выезды аддзелам не праводзіліся, а сёлета праца ў палявых умовах ажыццяўлялася з пэўнымі абмежаваннямі (камунікаванне з інфармантамі адбывалася па магчымасці на вуліцы, з захаваннем дыстанцыі).

Паважанае спадарства, прэзентацыя "Кітайска-беларускага слоўніка", якая была прызначана на 24 чэрвеня, адмяняецца. Пра правядзенне прэзентацыі будзе паведамлена асобна. Прыносім свае прабачэнні.

У межах дагавора аб супрацоўніцтве паміж Цэнтрам даследаванняў беларускай культуры, мовы і літаратуры НАН Беларусі і Мінскім абласным інстытутам развіцця адукацыі на базе Інстытута мовазнаўства імя Якуба Коласа 2 чэрвеня адбыўся навукова-практычны семінар. На сустрэчу з супрацоўнікамі Інстытута былі запрошаны настаўнікі беларускамоўных агульнаадукацыйных устаноў Мінскай вобласці. Дырэктар Інстытута І.Л. Капылоў пазнаёміў прысутных з асноўнымі напрамкамі навуковых даследаванняў, выніковымі фундаментальнымі выданнямі, якія сведчаць пра высокі ўзровень развіцця лінгвістычнай навукі і з’яўляюцца грунтоўнай матэрыяльнай базай для паспяховага ажыццяўлення адукацыйнага працэсу ў краіне на дзяржаўнай беларускй мове. Настаўнікам быў прадстаўлены шэраг лексікаграфічных даведнікаў, падрыхтаваных у аддзеле беларуска-рускіх моўных сувязей, пераважна загадчыкам І.У. Ялынцавай, адрасаваных непасрэдна школьнікам. На семінары былі абмеркаваны таксама асобныя аспекты захавання тэрміналагічнай дысцыпліны ў навучальных дапаможніках.

19 мая 2021 года ў дзяржаўнай установе адукацыі “Засульская сярэдняя школа” Стаўбцоўскага раёна Мінскай вобласці адбылося мерапрыемства, прысвечанае Дню славянскай пісьменнасці і культуры. Яно было  арганізавана ў межах супрацоўніцтва Нацыянальнай акадэміі навук Беларусі і Беларускай Праваслаўнай Царквы.